അറിയാം ഗര്ഭത്തിന്റെ പ്രാരംഭ ലക്ഷണങ്ങള്

ടെസ്റ്റ് ചെയ്യുന്നതിന് മുമ്പ് തന്നെ ഗർഭിണി ആണോ എന്ന് എങ്ങനെ തിരിച്ചറിയാം? ഗർഭിണിയാണോ എന്നറിയാൻ പ്രഗ്നൻസി ടെസ്റ്റ്‌ നടത്തുന്നതിന് മുമ്പ് ചില ലക്ഷണങ്ങളിലൂടെ ഈ കാര്യം തിരിച്ചറിയാം. എന്തൊക്കെയാണ് ഗർഭത്തിന്റെ പ്രാരംഭ സൂചനകൾ?

ഗര്‍ഭിണിയാണോ (Am I Pregnant)എന്ന്‌ എങ്ങനെ അറിയാന്‍ കഴിയും?

ഗർഭിണിയാണോ എന്ന് കൃത്യമായി അറിയണമെങ്കിൽ പ്രഗ്നന്‍സി ടെസ്റ്റ്‌ തന്നെ വേണം. ചില ലക്ഷണങ്ങൾ കണ്ടിട്ടാകുമല്ലോ നിങ്ങൾ പ്രെഗ്നൻസി ടെസ്റ്റ് ചെയ്യാൻ ഒരുങ്ങുന്നത്? എന്തൊക്കെയാണ് ഗർഭത്തിന്റെ ലക്ഷണങ്ങൾ? ആര്‍ത്തവം മുടങ്ങുന്നതിന്‌ മുമ്പ്‌ തന്നെ നിങ്ങള്‍ ഗര്‍ഭിണി ആണോ എന്ന്‌ സംശയിക്കാം. അല്ലെങ്കില്‍ അങ്ങനെ പ്രതീക്ഷിക്കാം. ഗര്‍ഭധാരണത്തിന്റെ ആദ്യ ലക്ഷണങ്ങള്‍ എന്തെല്ലാമാണന്നും അത്‌ എങ്ങനെയാണ്‌ ഉണ്ടാകുന്നത്‌ എന്നും മനസിലാക്കാം.

ഗര്‍ഭധാരണത്തിന്റെ പ്രാരംഭ സൂചനകളും ലക്ഷണങ്ങളും

മനംപുരട്ടൽ മുതൽ ഛർദ്ദി വരെ ഗർഭത്തിന്റെ പ്രാരംഭ സൂചനകളാണ്. എന്നാൽ എല്ലാവർക്കും ഒരു പോലെ അല്ല ഈ ലക്ഷണങ്ങൾ. ഗർഭാവസ്ഥയുടെ സാധാരണ ലക്ഷണങ്ങള്‍ ഇവയാണ്.

ആര്‍ത്തവം മുടങ്ങുക

ഗര്‍ഭധാരണശേഷിയുള്ള കാലയളവില്‍ സ്‌ത്രീകളില്‍ ആര്‍ത്തവം ക്രമമായി സംഭവിക്കാറുണ്ട്‌. എന്നാല്‍ പ്രതീക്ഷിച്ച ദിവസത്തിന്‌ ശേഷം ഒരാഴ്‌ചയോ അതില്‍ കൂടുതലോ കഴിഞ്ഞിട്ടും ആര്‍ത്തവം ഉണ്ടാകുന്നില്ല എങ്കില്‍ ഗര്‍ഭധാരണം നടന്നിരിക്കാം. അതേസമയം, നിങ്ങളുടെ ആര്‍ത്തവം ക്രമരഹിതമാണെങ്കില്‍ ഇത്‌ നിങ്ങളെ തെറ്റിദ്ധരിപ്പിച്ചേക്കാം. അതുകൊണ്ട് ഈ ലക്ഷണം മാത്രം നോക്കി ഗർഭമുണ്ടെന്ന് തീരുമാനിക്കരുത്.

മൃദുലവും വീര്‍ത്തതുമായ സ്‌തനങ്ങള്‍

ഗര്‍ഭധാരണത്തിന്റെ ആദ്യ കാലങ്ങളില്‍ ഉണ്ടാകുന്ന ഹോര്‍മോണ്‍ വ്യതിയാനം നിങ്ങളുടെ സ്‌തനങ്ങളെ മൃദുലമാക്കും. മാത്രമല്ല സ്‌തനങ്ങളില്‍ വേദന അനുഭവപ്പെടുകയും ചെയ്യും. ഹോര്‍മോണ്‍ വ്യതിയാനവുമായി ശരീരം പൊരുത്തപ്പെടുന്നതിന്‌ അനുസരിച്ച്‌ ഏതാനം ആഴ്‌ചകള്‍ക്കുള്ളില്‍ ഈ അസ്വസ്ഥത കുറഞ്ഞു വരും.

ഛര്‍ദ്ദിയോടു കൂടിയും അല്ലാതെയും ഉള്ള മനം പുരട്ടല്‍

ഗര്‍ഭധാരണത്തെ തുടര്‍ന്ന്‌ ഉണ്ടാകുന്ന ഛര്‍ദ്ദി രാവിലെയും രാത്രിയും ഏത്‌ സമയത്തും അനുഭവപ്പെടാം. ഗര്‍ഭം ധരിച്ച്‌ ഒരു മാസം കഴിയുമ്പോഴാണ്‌ ഇത്‌ തുടങ്ങുന്നത്‌. ചിലര്‍ക്ക്‌ വളരെ നേരത്തെ തന്നെ മനംപുരട്ടല്‍ അനുഭവപ്പെടാറുണ്ട്‌, എന്നാല്‍ ചിലര്‍ക്ക്‌ ഒരിക്കലുമിത്‌ ഉണ്ടാകാറും ഇല്ല. ഗര്‍ഭകാലത്തെ മനംപുരട്ടലിന്റെ കാരണം വ്യക്തമല്ല, ഹോർമോൺ വ്യതിയാനങ്ങൾ ആയിരിക്കാം ഇതിന്റെ പിന്നിൽ പ്രവര്‍ത്തിക്കുന്നത്‌.

മൂത്രശങ്ക കൂടും

ഗര്‍ഭധാരണത്തെ തുടര്‍ന്ന്‌ സ്‌ത്രീകളില്‍ മൂത്രശങ്ക ഉയരാറുണ്ട്‌. സാധാരണയില്‍ നിന്നും വ്യത്യസ്‌തമായി ഇടയ്‌ക്കിടെ മൂത്രമൊഴിക്കാന്‍ തോന്നും. ഗര്‍ഭകാലത്ത്‌ നിങ്ങളുടെ ശരീരത്തിലെ രക്തത്തിന്റെ അളവ്‌ ഉയരും, വൃക്കകള്‍ അധിക ദ്രവം ഉത്‌പാദിപ്പിക്കുകയും അത്‌ മൂത്രസഞ്ചിയിലേക്കെത്തുകയും ചെയ്യും.

ക്ഷീണം

ഗര്‍ഭാവസ്ഥയുടെ പ്രാരംഭ ലക്ഷണങ്ങളില്‍ പ്രധാനമാണ്‌ ക്ഷീണവും തളര്‍ച്ചയും. ഗര്‍ഭാരംഭത്തില്‍ പ്രോജസ്‌ട്രോണ്‍ ഹോര്‍മോണിന്റെ അളവ്‌ ഉയരും ഇത്‌ ഉറക്കം വരാന്‍ കാരണമാകും.

ഗര്‍ഭധാരണത്തിന്റെ ആദ്യ മൂന്ന്‌ മാസങ്ങളില്‍ അനുഭവപ്പെട്ടേക്കാവുന്ന ചില ലക്ഷണങ്ങള്‍:

വൈകാരികമായ മാറ്റങ്ങൾ

ഗര്‍ഭധാരണത്തിന്റെ തുടക്കത്തില്‍ ശരീരത്തില്‍ ഉണ്ടാകുന്ന ഹോര്‍മോണ്‍ വ്യതിയാനം നിങ്ങളെ കൂടുതല്‍ വികാരാധീനരാക്കും. ഇത്‌ നിങ്ങളില്‍ വിഷാദം ഭാവം നിറച്ചേക്കാം. ഇക്കാലയളവില്‍ വൈകാരികമായി ചാഞ്ചാട്ടം ഉണ്ടാവുക സാധാരണമാണ്‌.

വയർ വീർത്തിരിക്കുന്ന അവസ്ഥ

ഗര്‍ഭധാരണത്തിന്റെ പ്രാംഭത്തില്‍ ഉണ്ടാകുന്ന ഹോര്‍മോണ്‍ വ്യതിയാനങ്ങള്‍ ആണ്‌ വയർ വീർത്തിരിക്കുന്നതായി തോന്നാന്‍ കാരണം. ആര്‍ത്തവം തുടങ്ങുമ്പോള്‍ ഉണ്ടാകുന്ന അനുഭവം പോലെയായിരിക്കും ഇത്‌.

സ്‌പോട്ടിങ്‌

ഗര്‍ഭധാരണത്തിന്റെ ആദ്യ ലക്ഷണങ്ങളില്‍ ഒന്നാണ്‌ ചെറിയ അളവിലുള്ള സ്‌പോട്ടിങ്‌. ഇംപ്ലാന്റേഷന്‍ ബ്ലീഡിങ്‌ എന്നാണ്‌ ഇത്‌ അറിയപ്പെടുന്നത്‌, ബീജസങ്കലനം നടന്ന അണ്ഡം ഗര്‍ഭപാത്രത്തിന്റെ ഭിത്തിയില്‍ വന്ന്‌ ചേരുമ്പോഴാണ്‌ ഇത്‌ സംഭവിക്കുന്നത്‌. ഗര്‍ഭധാരണത്തിന്‌ ശേഷം ഏകദേശം 10 മുതല്‍ 14 ദിവസമാണ്‌ ഇത്‌ കാണപ്പെടുക. ആര്‍ത്തവ കാലയളവിലാണ്‌ ഇത്തരത്തില്‍ ചെറിയ തോതിലുള്ള രക്തസ്രാവം അനുഭവപ്പെടുന്നത്‌. എല്ലാ സ്‌ത്രീകളിലും ഇത്‌ ഉണ്ടാകണം എന്നില്ല

പേശീവലിവ്‌

ചില സ്‌ത്രീകള്‍ക്ക്‌ ഗര്‍ഭാവസ്ഥയുടെ തുടക്കത്തില്‍ പേശീവലിവും വയറ്‌ വേദനയും അനുഭവപ്പെടാറുണ്ട്‌.

മലബന്ധം

ഗർഭത്തിന്റെ പ്രധാന ലക്ഷണങ്ങളിൽ ഒന്നാണിത്. ശരീരത്തിലെ ഹോര്‍മോണ്‍ വ്യതിയാനം ദഹനപ്രവര്‍ത്തനങ്ങള്‍ സാവധാനത്തിലാകാന്‍ കാരണമാകും. ഇത്‌ മലബന്ധത്തിന്‌ വഴിതെളിക്കും.

ഭക്ഷണത്തോട്‌ വെറുപ്പ്‌

ഗർഭത്തിന്റെ മറ്റൊരു ലക്ഷണമാണ് ഇഷ്ടപെട്ട ഭക്ഷണങ്ങളോട് വെറുപ്പ് തോന്നുന്നതും ഇഷ്ടമില്ലാത്ത ഭക്ഷണങ്ങൾ കഴിക്കാൻ തോന്നുന്നതും. ഗര്‍ഭധാരണത്തെ തുടര്‍ന്ന്‌ നിങ്ങള്‍ക്ക്‌ ചില ഗന്ധങ്ങള്‍ ഇഷ്ടപ്പെടാതെ വരികയും ഭക്ഷണത്തോടുള്ള താല്‍പര്യത്തില്‍ മാറ്റം വരികയും ചെയ്യും. ഇക്കാലയളവില്‍ ചില രുചികളോട്‌ കൂടുതല്‍ ഇഷ്ടവും ചിലതിനോട്‌ വെറുപ്പും തോന്നുക സ്വാഭാവികമാണ്‌. ഗര്‍ഭധാരണത്തിന്റെ മറ്റ്‌ ലക്ഷണങ്ങള്‍ പോലെ തന്നെ ഭക്ഷണത്തോടുള്ള ഈ വൈമുഖ്യത്തിനും കാരണമാകുന്നത്‌ ഹോര്‍മോണ്‍ വ്യതിയാനം തന്നെയാണ്‌.

ശ്വാസ തടസ്സം

ഹോര്‍മോണിന്റെ അളവും രക്തത്തിന്റെ ഉത്‌പാദനവും ഉയരുന്നത്‌ മൂക്കിലെ ശ്‌ളേഷ്‌മപാളി വീര്‍ക്കുന്നതിനും വരണ്ടുണങ്ങി വളരെ എളുപ്പം രക്തം വരുന്നതിനും കാരണമാകും. മൂക്കടപ്പ്‌, മൂക്കൊലിപ്പ്‌ എന്നിവ ഉണ്ടെങ്കിലും ഇതിനുള്ള സാധ്യത കൂടുതലാണ്‌.

നിങ്ങള്‍ ശരിക്കും ഗര്‍ഭിണിയാണോ?

നിര്‍ഭാഗ്യവശാല്‍, ഇതില്‍ പല ലക്ഷണങ്ങളും സൂചനകളും ഗര്‍ഭധാരണത്തിന്റേത്‌ മാത്രമായുള്ളതല്ല. ചിലത്‌ മറ്റ്‌ ചില അസുഖങ്ങളുടെ സൂചനയാകാം. അല്ലെങ്കില്‍ നിങ്ങളുടെ ആര്‍ത്തവം തുടങ്ങാറായതിന്റെ ലക്ഷണം ആവാം. അതുപോലെതന്നെ ഇതില്‍ പല ലക്ഷണങ്ങളും അനുഭവപ്പെട്ടില്ല എങ്കിലും നിങ്ങള്‍ ഗര്‍ഭിണി ആയേക്കാം.

ആര്‍ത്തവം മുടങ്ങുകയും മുകളില്‍ പറഞ്ഞിരിക്കുന്ന ലക്ഷണങ്ങളില്‍ ഏതെങ്കിലും ശ്രദ്ധയില്‍പെടുകയും ചെയ്യുകയാണെങ്കില്‍, വീട്ടില്‍ തന്നെ പ്രഗ്നന്‍സി ടെസ്റ്റ്‌ നടത്തി നോക്കുക. പ്രത്യേകിച്ച്‌ ആര്‍ത്തവ ചക്രം നിങ്ങള്‍ യഥാക്രമം പിന്തുടരുന്നില്ല എങ്കിലും ആര്‍ത്തവം ഓരോ മാസവും ക്രമരഹിതം ആണെങ്കിലും ടെസ്‌റ്റ്‌ നടത്തുക. പ്രഗ്നന്‍സി ടെസ്റ്റ്‌ വീട്ടില്‍ ചെയ്‌ത്‌ നോക്കുമ്പോള്‍ പോസിറ്റീവ്‌ ആണെങ്കില്‍ ഉടന്‍ തന്നെ ഒരു ഡോക്ടറെ കാണുക. ഗര്‍ഭധാരണം ഉറപ്പു വരുത്തി കഴിഞ്ഞാല്‍ ഉടന്‍ തന്നെ ഗര്‍ഭകാല പരിചരണം ആരംഭിക്കണം.

ഗര്‍ഭത്തിന്റെ പ്രാരംഭ ലക്ഷണങ്ങള്‍ സംബന്ധിച്ച്‌ സംശയം തോന്നുന്നുണ്ടെങ്കില്‍ സ്വയം തീരുമാനത്തിൽ എത്താതെ പ്രഗ്നന്‍സി ടെസ്റ്റ്‌ നടത്തി നോക്കുന്നതാണ്‌ തന്നെയാണ് ഉചിതം. ഗര്‍ഭകാല ലക്ഷണം എന്നതിന്‌ അപ്പുറം നിങ്ങള്‍ ഒരു കുഞ്ഞിനെ ഗര്‍ഭം ധരിച്ചിട്ടുണ്ടോ ഇല്ലയോ എന്നതിന്റെ ശാസ്‌ത്രീയമായ തെളിവ്‌ കൂടിയാണിത്‌. ആര്‍ത്തവം മുടങ്ങിയതിന്‌ ശേഷം കുറഞ്ഞത്‌ ഒന്നോ രണ്ടോ ദിവസം കാത്തിരുന്നതിന്‌ ശേഷമാണ്‌ പ്രഗ്നന്‍സി ടെസ്റ്റ്‌ നടത്തുന്നതെങ്കില്‍ കൂടുതല്‍ ഫലപ്രദമായി പ്രവര്‍ത്തിക്കും.